Բարձրագույն խումբ. 17-րդ տուրի խորհրդանշական հավաքականը

Հայաստանի առաջնության 17-րդ տուրի խորհրդանշական հավաքականը armsport.am-ը կազմել է 3-5-2 դասավորությամբ: 3-ական ներկայացուցիչ ունեն «Շիրակն» ու «Իմպուլսը», 2-ական` «Միկան» ու «Գանձասարը», 1' «Բանանցը»:

Դարպասապահ 
Գոռ Էյլազյան («Իմպուլս»)
Էյլազյանը լավ հանդիպում անցկացրեց «Փյունիկի» հետ մրցավեճում, իսկ միակ գնդակը բաց թողեց 11 մետրանոցից: 

Պաշտպաններ 
Գագիկ Դաղբաշյան («Բանանց»)
Երիտասարդ պաշտպանը ձախ եզրում լավ տպավորություն թողեց ու չընկրկեց տանտերերի ճնշմանը:

Հրայր Մկոյան («Շիրակ») 
Հայաստանի հավաքականի ֆուտբոլիստը բավական գրագետ խաղ ցուցադրեց ու մի շարք դրվագներում կարողացավ վնասազերծել հյուրերի գրոհայիններին:

Էդուարդ Կակոսյան («Իմպուլս») 
Պաշտպանության աջ եզրում Կակոսյանը աչքի ընկավ ապահով խաղով:

Կիսապաշտպաններ 

Յորո Լի Լամին («Շիրակ») 
Վնասվածքի պատճառով Յորոն «Ուլիսի» հետ մրցավեճում պահեստայինների թվում էր, սակայն երկրորդ խաղակեսում փոխարինման դուրս գալուց հետո երկու գոլ խփեց ու հաղթանակ պարգևեց «Շիրակին»: 

Աղվան Մկրտչյան («Միկա»)
Մեծ ծավալի աշխատանք կատարեց  ու մի քանի տպավորիչ անցումներ ձեռնարկեց: Հյուրերը ոչ միշտ էին կարողանում կասեցնել Մկրտչյանին: 

Կարեն Մուրադյան («Շիրակ»)
Գյումրեցիների կենտրոնական կիսապաշտպանը հերթական հաջող հանդիպումն անցկացրեց: 

Դիեգո Լոմբե(«Գանձասար»)
Լոմբեն «Բանանցի» հետ մրցավեճում բավական ակտիվ էր ու հիմնականում հենց նա էր սրություն հաղորդում կապանցիների գործողություններին: 

Արեգ Ազատյան («Միկա»)
Ազատյանն «Արարատի» հետ հանդիպման առաջին խաղակեսում այնքան էլ ակտիվ չէր, սակայն երկրորդում նա ավելի շատ էր գնդակ ստանում ու ավելի մեծ սրություն էր հաղորդում տանտերերի գործողություններին: Հենց նրա փոխանցումից հետո էլ Մուրդայանը խփեց հանդիպման միակ գնդակը: 

Հարձակվողներ 
Նորայր Գյոզալյան («Իմպուլս»)
Առաջնության լավագույն ռմբարկուն շարունակում է ավելացնել գոլերի քանակը: Ու կրկին Նորայրը բավական գեղեցիկ գոլ խփեց' այս անգամ գրավելով «Փյունիկի» դարպասը: 

Ռեջիլիո Զեդորֆ («Գանձասար»)
Հոլանդացին երկրորդ խաղում անընդմեջ դառնում է գոլի հեղինակ: Զեդորֆն ավելի լավ է մերվել կապանցիների խաղին ու զգալիորեն բարձրացրել է օգտակար գործողությունների գործակիցը: